އދ. ހަންޏާމީދޫއަށް ބޯކޮށް ވާރޭވެހި ބައެއް ގެތަކަށް ފެންވަދެއްޖެއެވެ.
ހަންޏާމީދޫއިން ވާހަކަދެއްކި މީހަކު ބުނީ މިއަދު އިރުއޮއްސި 6:30ގައި ވެހެން ފެށި ވާރޭ އަދިވެސް ނުހުއްޓާ ކަމަށާއި އެކަމުގެ ސަބަބުން މަގުމަތުގައި ފެންބޮޑުވެ، ބައެއް ގެތަކަށް ފެންވަދެފައިވާ ކަމަށެވެ.
އޭނާ ބުނީ ފެން ވަތް ގެތަކުގެ ތެރެއިން ތިން ގެއަކަށް ވަރަށް ބޮޑަށް ފެން ވަދެފައިވާ ކަމަށާއި އެ ތިން ގޭގެ ސިޓިން ރޫމާ ހަމައަށް ފެންވަދެފައިވާ ކަމަށެވެ. އަދި އެ ގެތަކުގައި ހިފާ ގެންގުޅޭ ބައެއް ތަކެއްޗަށް ގެއްލުން ވެފައިވާ ކަމަށް އޭނާ މައުލޫމާތު ދެއެއެވެ.
އޭނާ އިތުރަށް ބުނީ ހަންޏާމީދޫ ކައުންސިލާއި ރައްޔިތުން ގުޅިގެން ފެން ހިއްކުމުގެ މަސައްކަތް ކުރަމުންދާ ކަމަށާއި ފެން ވަދެފައިވާ ގެތަކަށް އެހީތެރިކަން ފޯރުކޮށްދެމުންދާ ކަމަށެވެ.
މޫސުމް ގޯސްވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން ދެންމެ ވަނީ އއ. އަތޮޅުން ފެށިގެން އައްޑޫ ސިޓީއާ ހަމައަށް ހުދު ސަމާލު ނެރެފައެވެ. މި އެލާޓް ނެރެފައިވަނީ މިރޭ 20:00 އިން ފެށިގެން މާދަމާ މެންދަމު 2:00 އާއި ހަމައަށެވެ. މި ވަގުތުތަކުގައި ބޯކޮށް ވާރޭވެހުމާއެކު ވިލާގަނޑުގައި ގާތް ގަނޑަކަށް 40 މޭލަށް ވައި ގަދަވާނެ ކަމަށް ލަފާ ކުރެވޭ ކަމަށް މެޓް އޮފީހުން ބުނެއެވެ.