ވާ ކަނޑައިގެން ގޮސް ކަނޑަށް ގެއްލުނު ދޯންޏެއް ހޯދައިފި

އައްޑޫ ސިޓީއިން ފުރައިގެން ހުވަދު އަތޮޅަށް ދަތުރުކުރަމުން ދަނިކޮށް ގެއްލިގެން ރޭގައި ރިޕޯޓުކުރި މަސްދޯނި ފެނިއްޖެއެވެ.

އެމްއެންޑީއެފްއިން ބުނީ “ވީނަ” ނަމަކަށް ކިޔައި އެ މަސްދޯނި ހޯދުމަށް ވައިގެ މަގުން އެމްއެންޑީއެފްގެ ހެލިކޮޕްޓްރުގައި ކުރި މަސައްކަތުން އެ ދޯނި ފެނިފައިވާ ކަމަށެވެ.

ގެއްލުނު މަސްދޯނި ފެނިފައިވަނީ އައްޑޫސިޓީގެ ހުޅަނގުން 40 ނޯޓިކަލްމޭލު ބޭރުން، މިއަދު ހެނދުނު 9:58 ހާއިރު ކަމަށް ވެސް އެމްއެންޑީއެފުން މައުލޫމާތު ދެއެވެ.

“ވީނަ” މަސްދޯނި ގެއްލިގެން ރިޕޯޓު ކޮށްފައިވަނީ ރޭ 8:15 ހާއިރެވެ. އެ ދޯނި ހޯދުމަށް ދޯނީގެ ވެރިފަރާތުންނާއި އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރޮން ލޯންޗު ހުއްޓުމެއް ނެތި ހަރަކާތްތެރިވަމުން ދިޔަކަން އެމްއެންޑީއެފުން ބުނެއެވެ.