ރާއްޖެއާއި އިންޑިއާ ދެމެދު ވެފައިވާ ޑޯނިއާ އަދި ހައިޑްރޮގްރަފީ އެއްބަސްވުމުގައި ހިމެނޭ ކަންކަން ސިއްރު ކުރަން ލާޒިމު ކުރާ އެއްވެސް މާއްދާއެއް ލިޔެކިއުންތަކުގައި ނެތްކަމަށް ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެއްޖެ އެވެ.
ދެ ގައުމުގެ ދެމެދު ވެފައިވާ ސިއްރު އެއްބަސްވުންތަކުން ގައުމީ ސަލާމަތަށް ނުރައްކާވާކަމަށް ބުނެ ހުށަހަޅާފައިވާ މައްސަލައިގައި މަޖިލީހުގެ ސަލާމީ ހިދުމަތްތަކާއި ބެހޭ ކޮމިޓީން ވަނީ ގައުމީ ދިފާއީ ބާރާއި ބައްދަލުކޮށްފަ އެވެ. އަދި ޑޯނިއާއާއި ހައިޑްރޯގްރަފީ އެއްބަސްވުމާއި ބެހޭ މައުލޫމާތު ހިމެނޭ ޕްރެޒެންޓޭޝަނެއް ކޮމިޓީގެ މެމްބަރުންނަށް ވަނީ ހުށަހަޅާފަ އެވެ. ޕްރެޒެންޓޭޝަނުގެ ތަފްސީލު ދިނުމުގެ ބައި ކުރިޔަށް ގެންދިޔައީ ސިއްރުކޮށްގެން ކަމުން އޭގައި ހިމޭނޭ މާ ތަފްސީލީ މައުލޫމާތުތައް މީޑިއާތަކަށް ސާފެއް ނޫނެވެ. އެހެން ނަމަވެސް މީގެ ކުރިން އެނގިފައި ނެތް އެތައް މައުލޫމާތެއް ކޮމިޓީގައި އެމްއެންޑީއެފްގެ ފަރާތުންނާއި، ކޯސްޓްގާޑުން ހިއްސާ ކުރި އެވެ.
އޭގެ ތެރޭގައި ރާއްޖޭގައި ޑޯނިއާ އަދި ހެލިކޮޕްޓަރު ބެލެހެއްޓުމަށް ދިބި އިންޑިއާ އޮފިސަރުންގެ އަދަދާއި، ހައިޑްރޯގްރަފީ އެއްބަސްވުމުން ލިބޭ ބައެއް މާލީ މަންފާތަކުގެ ވާހަކަތައް ހިމެނެ އެވެ.
ޕްރެޒެންޓޭޝަނަށް ފަހު ސުވާލަށް ހުޅުވާލުމުން މެމްބަރުންގެ ގިނަ ސުވާލުތައް އަމާޒުވި އެވެ. އޭގެ ތެރެއިން އުޝާމް ސުވާލު ކުރެއްވީ އެއްބަސްވުން ސިއްރު ވާނެކަމަށް ބުނާ މާއްދާާއި ގުޅޭ ގޮތުންނެވެ. އެފަދަ އެއްވެސް މާއްދާއެއް ނެތި، ޕްރެސް ކޮންފަރެންސްތަކާއި ބައްދަލުވުންތަކުގައި އެ މައުލޫމާތު ދޭން ދެކޮޅު ހަދާ ސަބަބާއި ގުޅޭގޮތުން ސުވާލު ކުރުމުން ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވީ އެ އެއްބަސްވުމުގެ ދަށުން ބައެއް ކަންކަން ސިއްރު ކުރަން ޖެހޭ ކަމަށެވެ. އަދި އެކަން ބަޔާން ކުރާ މާއްދާއެއް އޮންނާނެ ކަމަށް ވިދާޅުވި އެވެ.
“ތިބޭފުޅުން ތި ހިއްސާ ކުރެއްވި ދެ އެގްރިމެންޓަށް ވަރަށް ޖެނެރަލް ސުވާލެއް ކުރަން ބޭނުންވީ… މި ދެ އެގްރިމެންޓުގަ ވެސް ލެޓާ އޮފް އެޗްޗޭންޖުގައި ވެސް، ފަހުން ހިއްސާ ކުރި އެގްރިމެންޓުގައި ވެސް އަޅުގަނޑަކަށް ފާހަގައެއް ނުކުރެވުނު އެއްވެސް ކަހަލަ ކޮންފިޑެންޝިއަލިޓީ ކްލޯޒްއެއް އޮތްކަމަކަށް… މާނައަކީ ތިބޭފުޅުންނަށް މި އެގްރިމެންޓުތައް އާއްމު ކުރުމަށް ވެސް އަދި އަޅުގަނޑުމެންނާއި ހިއްސާ ކުރުމަށް ވެސް މި އެގްރިމެންޓުގައި ނެތް ހާލަތެއްގައި އެ ހާމަކުރުމަށް ތިބޭފުޅުން ތި އިއުތިރާޒު ކުރައްވަނީ… އެއީ ކޮން ސަބަބަކާއި ހުރެތޯ…” އުޝާމް ވިދާޅުވި އެވެ.
“އެގްރިމެންޓުގައި ނެތް އެފަދަ އެއްވެސް ވާހަކައެއް… އެއީ ކޮން މާއްދާއެއްކަން ވިދާޅުވެދެއްވަފާނަން ތޯ..” އުޝާމް
“ތި ވިދާޅުވާ މާއްދާ އަޅުގަނޑަށް ވެސް އެބަ ސާފުވޭ، އެހެން ނަމަވެސް ހަމަ ގައިމުވެސް އަޅުގަނޑަކަށް ނުފެނުނު މި އެގްރިމެންޓު ފޮނުވުމަށް ނުވަތަ ދައްކަން އުޒުރުވެރިވާން ޖެހޭ އެއްވެސް ސަބަބެއް” އުޝާމް ތަކުރާރު ކުރެއްވި އެވެ.