އިދިކޮޅު ކޯލިޝަނުން ކުރިއަށް ގެންދާ “އިންޑިއާ އައުޓް” ކެމްޕޭނަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ހިނގާފައިވާ ގޯސްތައް ފޮރުވަން ވެގެން އެމަނިކުފާނު ހިންގަވާ “ޖަރީމާއެއް” ކަމަށް އެމްއެންޕީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް ވިދާޅުވެއްޖެއެވެ.
ކާނަލް ނާޒިމް މިފަދައިން ވިދާޅުވެފައިވަނީ އެމްއެންޕީއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
އެގޮތުން ކާނަލް ނާޒިމް ވިދާޅުވީ، ބޭރުގެ އެއްވެސް އަސްކަރިއްޔާއެއް ރާއްޖޭގައި ތިބުމަށް އެމްއެންޕީން ނޭދޭނެކަމަށާއި، އެހެންނަމަވެސް “އިންޑިއާ އައުޓް” ކެމްޕޭނަކީ އެހެން ބޭނުމަކު ހިންގަމުން އަންނަ ކަމެއްކަމަށެވެ.
“އެއީ ގައުމީ ކެމްޕޭނެއް ގޮތަކު އަޅުގަނޑުމެން ނުދެކެން، އެއީ ދިވެހި އިގްތިސާދަށް ވެސް ގެއްލުން ލިބޭ ގޮތަށް، އެއްވެސް ވިސްނުމެއް ނެތި ކުރާ ކަމެއް، އޭގައި އެއްވެސް ރައްޔިތަކު ބައިވެރިނުވާން އަޅުގަނޑުމެން އިލްތިމާސް ކުރަން،” ނާޒިމް ވިދާޅުވިއެވެ.
ނާޒިމު ވަނީ އެ ހަރަކާތުގައި އެއްވެސް ރައްޔިތަކު ބައިވެރިނުވާން އިލްތިމާސް ކުރައްވާފައެވެ.