ރާއްޖޭގެ މިއަދުގެ ހާލަތު އޮތީ، އެންމެން ނިކުމެ ގައުމުގެ ދިފާއުގައި މަސައްކަތް ކުރަންޖެހޭ ހާލަތެއްގައިކަމަށް ޕީޕީއެމްގެ ނައިބު ރައީސް އަދި ގުރައިދޫ ދާއިރާގެ މެމްބަރު ޣައްސާން މައުމޫން ވިދާޅުވެއްޖެ އެވެ.
ޣައްސާން ކުރެއްވި ގައުމީ ދުވަހުގެ ޓުވީޓުގައި ވިދާޅުވީ، މިނިވަންކަމާއި ސިޔާސަތު ހިމާޔަތްކޮށް ރައްކާތެރި ކުރުމަކީ ކޮންމެ މީހެއްގެ ވެސް ޒިންމާއެއް ކަމަށެވެ. ޣައްސާން ވިދާޅުވީ، ގައުމުގެ މިނިވަންކަން ދިފާއު ކުރުން އެއީ ކޮންމެ ބައެއްގެ ފަރުދީ ޒިންމާއަކަށް ވާތީ އެ މަސައްކަތަށް އެންމެން އެކީ ގުޅިގެން ނިކުތުމަށް އާދޭސް ދަންނަވާ ކަމަށެވެ.
Qawmy dhuvahuge heyo edhun mi dhannavany, minivan kamai siyãdhathu himãyaih kurumaky farudhy zimmã eh kamun, Qawm dhifãu kurumuge masahkathah thedhuvevadaigathumah emmehai lobuvethi Dhivehi dharinge arihu ãdheys dhannavamun. pic.twitter.com/YW5qQGjuQX
— Mohamed Ghassan Maumoon (@mgmaumoon) September 27, 2022
ގިނަ ދުވަސްތަކަށް ފަހު އިދިކޮޅުގެ ލީޑަރު ރައީސް އަބްދުﷲ ޔާމީން އަބްދުލްގައްޔޫމް ވެސް ޓުވީޓެއް ކުރައްވައި ވިދާޅުވީ މިއަދު ހަނދާނަށް އަންނަނީ ބޮޑުތަކުރުފާނުގެ މަތިވެރި ޖިހާދުގެ މަތީން ނަމަވެސް ދުވަސް ފާހަގަ ކުރަން ޖެހިފައި ވަނީ ހިތާމައާއި މާޔޫސްކަމާއި އެކު ކަމަށެވެ. އަދި މިއީ ބަނަވަމުން ދާ ހިތްދަތި ދުވަސްތަކެއްގެ ގޮތުގައި ސިފަ ކުރައްވައި ރައީސް ޔާމީން ވިދާޅުވީ ދުވަހުގެ ތަހުނިޔާ ފޮނުވަން ޖެހިފައި ވަނީ ހިތާމާއާއި ފުން އަސަރުގެ ކަރުނައާއި އެކު ކަމަށެވެ.
އިދިކޮޅު ކޯލިޝަނުގެ ގިނަ ލީޑަރުން މިއަދު ޓުވީޓު ކުރައްވައި ވަނީ ރާއްޖޭގެ މިނިވަންކަމާއި، އިސްތިގުލާލަށް ބޫރުއަންނަ އެތައްކަމެއް ސަރުކާރުން ކުރަމުންދާކަމުގެ ތުހުމަތުކޮށްފަ އެވެ. އަދި ސަރުކާރުގެ ތެރެއަށް އަވައްޓެރި އިންޑިއާގެ ނުފޫޒު ވެދެފައި އޮތުމާއި އެ ގައުމުގެ ސިފައިން ރާއްޖޭގައި ހަތިޔާރާއި އެކު ތިބޭ ތިބުމަށް ނިމުމެއް އެ ޕާޓީން ގެންނާނެކަމަށް ވަނީ ބުނެފަ އެވެ.
މި މަސައްކަތްތަކަށް އިދިކޮޅުން، އިންޑިއާ އައުޓްގެ ނަމުގައި ހަރަކާތެއް ފެށި ނަމަވެސް އެ ހުއްޓުމެއް އައީ މިއީ ގައުމީ ސަލާމަތަށް ހުރި ނުރައްކަލެއްކަމަށް ކަނޑައަޅައި ރައީސުލްޖުމްހޫރިއްޔާ ގަރާރެއް ނެރުއްވުމުންނެވެ.