މި ސަރުކާރު ގެނައުމަށް ޝިފާޒަށް ވުރެ ބޮޑު ގުރުބާނީއެއް ވީ މީހެއް ނެތް: ނަޝީދު

ރައީސުލްޖުމްހޫރިއްޔާ އޮފީހުގެ މިނިސްޓަރުގެ މަގާމުން ވަކި ކުރި، އެމްޑީޕީގެ ނައިބު ރައީސް މުހައްމަދު ޝިފާޒަށް ވުރެ ބޮޑަށް މި ސަރުކާރު ގެނައުމަށްޓަކައި ގުރުބާނީތައް ވީ އިތުރު މީހެއް ނެތްކަމަށް ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެމްޑީޕީގެ އެތެރޭގައި މައްސަލަތައް އުފެދި، ސަރުކާރާއި ދެކޮޅު އަދި ސަރުކާރާއި އެއްކޮޅު ފެކްޝަނެއް އުފެދިފައިވަނިކޮށް ރައީސް ނަޝީދާއި އެކު މަސައްކަތް ކުރައްވާ ޝިފާޒް މަގާމުން ވަކި ކުރީ މިއަދުގެ ވަގުތެއްގަ އެވެ. ޝިފާޒް މަގާމުން ވަކިކޮށްފާނެކަމަށް ބެލެވިފައިވާ ވަގުތެއްގައި، އޭނާ ސަރުކާރުން ބޭރުކޮށް އެ މަގާމަށް ދެން އައްޔަނުކޮށްފައި ވަނީ އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބްރޭ) އެވެ.

ޝިފާޒް މަގާމުން ވަކިކުރި މައްސަލައިގައި ރައީސް ނަޝީދު މިއަދު ވިދާޅުވީ، ކަންބޮޑުނުވުމަށް އެދޭކަމަށެވެ. އަދި ޝިފާޒްގެ މުސްތަގުބަލު އޮތީ ވަރަށް އުޖާލާކޮށްކަމަށް ރައީސް ނަޝީދު ވިދާޅުވި އެވެ.

MDP ge naib Raees @mdpshippe eh gothakah ves kanboduve nulavvaathi. Shifaz ah vure bodah mi sarukaaru geneumah qurubaanvee vaki ehen meeheh nuhunnane. Allah ge iraadhafulhun musthaqbal othee ujaalaakoh.

— Mohamed Nasheed (@MohamedNasheed) March 29, 2023

މީގެއިތުރުން އެމްޑީޕީގެ މަސައްކަތްތަކުގައި، ޝިފާޒާއި އެންމެ ގާތްކޮށް ފެނުނު މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވެސް ވިދާޅުވީ އެމްޑީޕީ ނެގެހެއްޓުމަށްޓަކައި އެކި ދަތިތަކާއި އަނިޔާގައި ޝިފާޒް ކުރެއްވި މަސައްކަތް އަގު ނުކުރެވޭނެކަމަށެވެ. އަދި ރައީސް އިބްރާހިމް މުހައްމަދު ސޯލިހު މިވަގުތު މަގާމުގައި ހުންނެވީ، އެފަދަ އެތައް ބައެއްގެ ހިންމަތުންކަމަށް ވިދާޅުވި އެވެ. އަދި ޝިފާޒް މަގާމުން ވަކި ކުރުން އެއީ ލަދުވެތި، ދެރަކަމެއްގެ ގޮތުގައި އީވާ ސިފަ ކުރެއްވި އެވެ.

ޓުވީޓު ނިންމަވާލައްވަމުން އީވާ ވިދާޅުވީ، ސަރުކާރު މިހާރު އޮތީ ބަލިކަށިވެ ގޮތް ހުސްވާ ހިސާބަށް ގޮސްފައިކަމަށެވެ.

ކުރިޔަށް އޮތީ 2023 ގެ ރިޔާސީ އިންތިހާބުކަމަށްވުމާއި އެކު، ސަރުކާރާއި ދެކޮޅު ބައެއް ބޭފުޅުންނާއި ޖުމްހޫރީ ޕާޓީގެ ވަޒީރުންނާއި ނައިބުން އަދި ސިޔާސީ މަގާމުތަކުން މެމްބަރުން ވަކި ކުރާނެކަމަށް ބެލެވެ އެވެ.

ރައްޔިތުންގެ މަޖިލީހުގެ ޖަލްސާގައި ވެސް މެމްބަރުން އެންމެ ބޮޑަށް ޖުމްހޫރީ ޕާޓީއަށް އަމާޒުކޮށް ވިދާޅުވަމުން ގެންދަވަނީ ސަރުކާރު ކޯލިޝަނުން ބޭރުވުމަށެވެ. އަދި ޕާޓީގެ ސްލޮޓު މަގާމުތައް ހުސް ކުރުމަށް ވަނީ ގޮވާލާފަ އެވެ.